जेव्हा ती घरभर........!
जेव्हा ती घरभर वावरते दिवसभर
घराच्या भिंती घराचे छत आणि घराचे फ्लोअर...
यांचेच वेध घेऊन सजवत असते
गादी आणि उशांचे कव्हर ....!
घराला कितीही आवरलं सावरलं
तरी भरत नाही तिेचे मन ......
कोप-यातलं जळमट, भिंतींचा उडालेला रंग
मिटवत नाहीत घराचं घरपण....
तरी कावरी बावरी होते तिची नजर.....!
घराबाहेर असली तरी
डोळ्यात भरून नेते घर .....
कुठे गैस लाईट पंखा चालू तर नाही गिझर...?
आतली नजर फिरून येते भरभर......
जेव्हा ती घरभर वावरते दिवसभर...!
घर तिच्या सोबत तिच्या आत असते.....!
कधी पाठीवर तर कधी मानगुटीवरही बसते.....
घराला घरपण देताना रोजच दमते भागते
तरी उंब-यातल्या रांगोळीत रंग भरून
स्वत :ला सिद्ध करीत असते..!
घराला लागते धाप जेव्हा ती थकते
घर चिडते, ओरडते जेव्हा ती चुकते
अनं एक दिवस ...
घर थांबते ....अस्ताव्यस्त होते...
घराचे घरपणही जाते.....
घर झुरते....
घर रडते.....
जेव्हा ती घरभर वावरत नसते दिवसभर.....!!!
@ समिधा
कोणत्याही टिप्पण्‍या नाहीत :
टिप्पणी पोस्ट करा