सोमवार, १० ऑगस्ट, २०१५

काय फरक पडतो ....!



काय फरक पडतो  ...
तू तिथे   ....
अनं मी इथे  …

तुझ्या वेदनेचा भास,
मला इथे होतो
अनं -
माझ्या आठवांचा
स्पर्श तुला तिथे होतो   …!

काय फरक पडतो   ....
तू तिथे   …
अनं मी इथे   …

तुझ्या श्वासांची ऊब
मला इथे जगवते
अनं -
माझ्या आसवांची
गाज़ तुला तिथे कळते  …!!

काय फरक पडतो   ....
तू तिथे   …
अनं मी इथे

तू अव्यक्तातही
खुप काही बोलतो
अनं -
माझ्या कवितांच्या
गाभ्यातून अविरत फुलतो   …!!!


                                                "  समिधा "

शुक्रवार, २४ जुलै, २०१५

"त्या फितूर वेळा ......!"





अश्या फितूर वेळा आल्या पुरते बुडालो असतो
सावरले नसते स्वतःला नजरेतून उतरलो असतो   …!!

भेट क्षणाचीच  होती  पण परत भेटलोच नसतो
प्रेमाचा उच्चारही  निघता पुरते बिथरलो असतो  .... !!

तू , मी अनं  वेगळ्या वाटा दूर राहूनही भंगलो असतो
सावरलो  म्हणून आजही हृदयाचा हृदयी संवाद असतो   …!!

मी तुला अनं तू मला आज दुवा देत राहिलो नसतो
कळलेच नसते जर कधी प्रेमाला वासनेचा शाप असतो   …!!!


                                                                         " समिधा "





 

बुधवार, १५ जुलै, २०१५

"ती सोडून गेली तेंव्हा .... !"







 माझ्यात तिला उतरवण्याचा अट्टाहास फिजूल होता
 तिला तिच्या सावलितही  माझा चेहरा कबूल नव्हता  ॥ १ ॥

 पाहिले तिच्या नजरेच्या पल्याड एक आकाश होता
 मी कुठेच आस पासही नव्हतो असलोच तर एक पाश होता || २ ॥ 

 ती खोल डोहाचा एक अथांग अविरत स्रोत होता
 माझा काठावरचा निश्च्छल  ताठ  काटेरी पहारा होता   ॥ ३ ॥

 ती सोडून गेली तेंव्हा प्रश्न पडलेच नाहीत तिला
 माझ्याभोवती तेंव्हा   प्रश्नसंशयाचा फास होता        ॥ ४ ॥


                                                   " समिधा  "




शनिवार, ३० मे, २०१५

" तुला काय माहीत …"


 a alone indian woman  paintings साठी प्रतिमा परिणाम


तुला काय माहीत   …
जेंव्हा आपल्यात सर्व निरर्थक आहे
असं घडत होतं   … तेंव्हाच
नेमकं तुझ्या अस्तित्वाचा
अर्थ माझ्यात भिनत होता   …!
सर्व कागद कित्येकदा फाडलेत मी
ज्यावर तुझे नावं लिहीले होते   .
पण मनावर कोरलेले कसे खणून काढावं   …?
तुला काय माहीत   …
तू परत यावंस असं
वाटत होतं  पण   .... तेंव्हाच
नेमकं माझ्या अस्तित्वाचा
अर्थ बदलत होता    …!!!

                                            
                                                          " समिधा "

मंगळवार, १७ मार्च, २०१५

" तो असाच अवचीत .... !"


 

तो असाच अवचीत भेटला 
गाभुळल्या नजरेला दिसला   .... !!
इवल्या इवल्या भेटींनी 
मनात व्यापून  बसला   .... !!
तो असाच अवचीत भेटला . 

चिमटीमधुनि फुलपाखरु 
अलगद निसटावा 
तो असाच अवचीत विरला  . 
पण मागे उरला 
रंग मुलायम हृदयी रुतलेला   !!
तो असाच अवचीत विरला  .


                                             "समिधा "

गुरुवार, २६ फेब्रुवारी, २०१५

तू आजही तसाच मोकळा अनं मी ....??


 


तू
चांदणझूल्यावर
झुलतोस तिथे
अनं  मी
प्रखर उन्हाच्या मखरात  …!!

तू मेंदिभरल्या 
पावलांचे ऐकतोस गुंजन 
अनं  मी 
रोज फिरते घेऊन 
शिव्या शापांचे आंदन  … !!

तूझे  रुपड़े रुबाबदार
रोज पाहतो  आरशात
अनं  मी
बापड़ी होऊन
डोके खुपसते अंधारात   …!!

तू काठावर प्रेमाच्या
अलगद तरंगत फिरलास
अनं मी
अथांग डोही बुडले
स्वप्नांचा  घेऊन ध्यास   … !!

तू पाठ फिरवली
तेंव्हा निष्कलंक , निर्मोही
अनं मी
पापिनी ,लज्जाहीन
दुरवर्तनी , दुराग्रही  .... !!

तू आजही
तसाच मोकळा
अनं मी
कोंडलेली
आत्माही कोंडला  …!!


                                       "समिधा "



मंगळवार, २० जानेवारी, २०१५

तू सोबत असलास की ..... !!

 

तू  सोबत  असलास की ,
उन्हाचेही चांदणे होते   …!!
तू खळखळून हसलास की ,
समुद्रालाही भरती येते    …!!
तू नुसता बघत असलास की ,
मौनालाही काव्य सुचते   …!!

                           
                         " समिधा "